Ангараг гаргийн дээжийг дэлхийд авчрах хурдан бөгөөд хямд арга олтлоо түр хугацаанд уг ажиллагааг зогсоож байгааг АНУ-ын Сансар судлалын байгууллага /НАСА/ мэдээлэв.

Ангараг гаргаас хөрс болон чулууны дээжийг дэлхийд авчрах нь НАСА-ийн урт хугацааны турш төлөвлөж буй ажлуудын нэг юм.

Саяхан хийсэн тооцооллоор эх дэлхийд тус гаргийн дээжийг авчрахад 8-11 тэрбум ам.доллар шаардлагатай бөгөөд 2040 оноос нааш ирэхгүй аж.

Уг тооцооллыг хэтэрхий үнэтэй бөгөөд удаан байна хэмээн НАСА үзэж байгаа юм. Тиймээс арай хямд мөн хурдан хугацаанд авчрах боломжтой аргыг судалж байна гэв.

НАСА-ийн эрдэмтэд удлаа гэхэд 2030 онд дээжийг эх дэлхийд авчрах зорилготой байгаа бөгөөд долоон тэрбум ам.доллароос хэтрүүлэхийг хүсэхгүй байна. 

Үүнээс хэтэрвэл дахин нэг шинэ хөлгийг Ангараг гараг руу илгээж буйгаас ялгаагүй зардал гарах гэнэ. 

НАСА-ийн хөлөг 2021 онд Ангараг гараг дээр газардаж, өнөөдрийг хүртэл хугацаанд нарийн гуурс бүхий 24 дээжийг цуглуулаад байгаа юм. Ангараг гаргийн амьдралыг судлахад нийт 30 гуурс дээж хэрэгтэй гэж үзэж буй.

Эх сурвалж-GoGo.mn